Və aleykumussalam və rahmətullah.
Uca Allah müsəlmanlara yer üzünün tamamına öz dinini hakim qılmağı əmr etmişdir. Bu hakim qılma prosesi isə iki növdən vasitələrlə həyata keçir: Mənəvi və Maddi.
Maddi vasitələrin ən önəmlilərindən biri mali gücdür. Mali güc, uca Allahın “güc toplayın” əmrinin ümumuna daxildir.
Günümüzdə bu mali güc başda yəhudilər olmaqla, İslam düşmənlərinin əlindədir və bunu İslama qarşı başarılı bir formada istifadə edirlər.
Boykot, Rəsulullahın “Müşriklərlə malınızla, canınızla və dilinizlə cihad edin” hədisinin ifadəsi üzrə kafirlərlə aramızda olan böyük savaşın, mali cəbhəsində bir mübarizə üsuludur. Din üçün qeyrət çəkən hər müsəlmanın bu savaşda üzərinə düşəni etməsi vacibdir.
Uca Allah dinin təməl prinsiplərindən birini öz müqəddəs kitabında belə ifadə edir:
وَتَعَاوَنُوا عَلَى الْبِرِّ وَالتَّقْوَى وَلَا تَعَاوَنُوا عَلَى الْإِثْمِ وَالْعُدْوَانِ وَاتَّقُوا اللَّهَ إِنَّ اللَّهَ شَدِيدُ الْعِقَابِ
“Yaxşılıq və təqvada yardımlaşın! Günah və düşmənlikdə yardımlaşmayın! Allahdan qorxun. Həqiqətən Allahın əzabı şiddətlidir.” (Əl Maidə: 5/2)
Bu mübarizə hər qadının, uşağın belə qatıla biləcəyi zülmə qarşı yardımlaşma növüdür. Qədim zamandan bəri fəqihlər bu mövzularda danışmışlar. Məsələn Hənəfi fəqihləri iynə, qartal tükü, ipək və bənzəri şeylərin kafir ölkələrə götürülməsini haram saymışlar. Çünki, iynə stratejik məhsul sayılan dəmirdəndir və silah hazırlanmasında istifadə edilir. Qartal tükü oxların arxasına taxılır, ipəkdən isə bayraqlar hazırlanırdı. Kafirlərə azda olsa güc qazandıracaq bu kimi şeylər qadağankən, qarşılığında ən stratejik məhsulların alındığı pulları onlara axıtmamız necə caiz ola bilər? Başqa ölkədə bizdən qazandığı pulla bir müsəlmanın övladını öldürəcəyini bildiyimiz halda, o ölkələrin məhsullarını necə ala bilərik? Bu hərəkətin İslam qardaşlığında yeri nədir?
Düşmənlərimizin boykotu bunun üçün tək bir şəri dəlil olmasaydı belə, sağlam bir ağılın tələbidir.
Xidmətindən razı olmadığımız üçün öz məhəlləmizdəki mağazadan deyil, daha uzaqdakından alış veriş etməyə ərinməzkən, nəfsimiz üçün bu qədər məsafə qət edərkən, müsəlman qardaşlarımızı öldürənlərə deyil, başqalarına xeyir vermək üçün əlimizi mağazada bir rəfdən digərinə atmağa ərinəcək qədər “müsəlman” ola bilmişik...
Effektivliyinə gəlincə Boykot yetərincə uğurlu bir mübarizə üsulu, çox güclü bir silahdır. Rəsulullahın – sallallahu aleyhi və səlləm – karikaturalarının çizilməsi hadisəsində, bütün İslam aləminin Danimarka məhsullarını boykot etməsinin onlara verdiyi maddi zərər təqribən 36 milyard euro idi ki, bu fantastik bir rəqəm və müsəlmanlar üçün böyük uğurdur.
Boykot ediləcək firmalara, yəni işin vaqiə-reallıq boyutuna gəlincə burada bəzi problemlər vardır. Çünki, satılan məhsulları təsnif etmək müəyyən araşdırmalardan sonra mümkündür. İnternetdə yəhudi firması olaraq təqdim edilən bir çox firmanın əslində İsraillə bir əlaqəsi yoxdur.
Bu təsbitdə müsəlmanlara vacib olan, firmaların monitoringini təşkil edib, mütəmadi olaraq boykot edilənlərin siyahısını dərc etməkdir. Ancaq hal hazırda “çayxana” səviyyəsindən yuxarı qalxa bilməyən bir topluluq olduğumuzu nəzərə alsaq, daha praktik yollara baş vurmalıyıq...
Bu isə, ən azından aldığımız məhsulların üzərindəki ölkə kodlarını (Məsələn İsrailin kodu 729 dur) və ya açıq yazıları təqib etmək və İslama xüsusi düşmənçiliyiylə seçilən ölkələrin məhsullarını almamaqdır. İstər bu ölkələr müsəlmanlara zülm etsin, istər İslami dəyərlərə qarşı hörmətsizlik göstərsinlər.
Bu sahədə ixtisas sahibi olan müsəlmanlarında Ümməti bu barədə məlumatlandırmaları vacibdir.
Mövzu həssas və genişdir. Ancaq qısa olaraq bu qədərin yetərli olduğu qənaətindəyəm. Tövfiq Allahdandır.
