Mövzuda Bir İsmarıc Var

[Muazzin]

Əssəlamu Aleykum. Reformistlərin saytından qadınları cümə namazı qılmağa çağıran bir məqalə oxudum. Onlar hənəfi fiqhinin görüşünü zəif və dəlilsiz(!) adlandırır, bəzi hədislərə əsasən "müctəhidlik" edərək, bu namazın qadınlara fərz olduğunu iddia edirlər. 

Maraqlı bir məqamdır ki, eyni saytda olan başqa məqalədə isə cümənin qadınlara vacib olmadığı yazılıb.

Sitat:"Kişi cinsindən olanlar üçün; cümə namazı qadınlar üçün vacib deyil, lakin onlar bu məqsədlə məscidə gəlmiş olsalar, bəzənib-düzənmək, açıq-saçıqlıq və çox danışmaq kimi şəriətə zidd hallara yol vermədikləri halda, onların cümə namazına gəlmələrinə mane olmaq olmaz"

Birinci məqalədə isə deyilirdi, sitat: "Bu da bir həqiqətdir ki, qadınların Cümə namazında iştirak etməyini dini bir borc olmaqdan çıxardan şifahi bir Sünnə yoxdur. Məqalənin sonunda da: "Verilən izahat və şərhlər fonunda qadınların Cümə namazı camaatlarında iştirakıyla əlaqədar olaraq Quran və Sünnənin ruhuna müvafiq formada deyiləcək söz budur: Cümə namazında iştirak etmələri lazımdır."

[Zeynul Abidin]

Aleykumussalam. Bu safsataya uzun cavab yazmaq olar. Ancaq düşünürəm ki, bir neçə önəmli məqamın qeyd edilməsi ağıl sahibi üçün yetərli olar:

 

1. Cümə namazının qadınlara vacib olmaması sadəcə Hənəfilərin deyil bütün məzhəblərin görüşüdür. Niyə məhz Hənəfilər hədəf seçilib? Çünki, Azərbaycan mühitində cahillər arasında belə bir təəssurat varki, Hənəfilər hədisləri tərk edib öz rəylərilə hökm edirlər və ümumiyyətlə hədis elmindən xəbərsizdirlər. Hənəfi məzhəbini azacıq öyrənən kimsə bunun belə olmadığını və iddiaçıların özlərinin cahil olduqlarına şahid olar.

Bu, məqalədə müəllifin ilk azdırıcı hiyləsidir.

Bu barədə elm əhlinin icmasına gəlincə bunu bir çox alim zikr etmişdir və məzhəblərin furu kitablarında bu hökmü görmək mümkündür. Mən icmaya bir neçə örnək vermək istərdim.

 

İbnul Munzir "Əl İcma" adlı kitabında deyir:

 

وأجمعوا على أن لا جمعة على النساء

 

"Alimlər icma etmişlər ki, qadınların üzərinə Cümə fərz deyil"

 

İbn Qudəmə "Əl Muğni" adlı kitabında deyir:

 

أما المرأة فلا خلاف في أنها لا جمعة عليها

 

"Qadına gəlincə, ona Cümənin fərz olmadığında ixtilaf yoxdur"

 

İbn Battal Əl Məliki Buxari şərhində deyir:

 

أجمعوا أنه لا جمعة على النساء

 

"Alimlər, qadınlara Cümənin fərz olmadığı haqda icma etmişlər"

 

Muhyissunnə Əl Bəğavi "Şərhus Sunnə" adlı əsərində deyir:

 

واتفقوا على أن لا جمعة على النساء

 

"Alimlər, qadınlara Cümənin fərz olmadığında ittifaq etmişlər"

 

2. Məqalə müəllifi deyir: Bu məsələ ilə əlaqədar olan hədislərin arasında hədis metodologiyası baxımından ən güclü hədis Əbu Davudun Tariq İbn Şihabdan rəvayət etdiyi: “Cümə namazı əsir, qadın, uşaq və xəstədən başqa bütün aqil möminlərə fərzdir (vacib)” – mənası verən hədisdir. Lakin Tariq İbn Şihab Həzrəti Peyğəmbəri görmüş, amma ondan hədis rəvayət etməmiş olduğu üçün bu hədis dəlil kimi götürülə bilməyəcək qəbildən olan zəif (mürsəl) bir hədisdir.”

Beləcə dəlil gətirilən hədisin zəifliyini isbatlamağa çalışır. Hədislə əlaqəli alimlərin fikri belədir:

 

İmam Nəvəvi "Əl Məcmu"da : "Buxari və Muslim şərtlərinə görə səhihdir"

İbn Rəcəb "Fəthul Bari"də: "İsnadı səhihdir"

İbn Kəsir "İrşadul Fəqih"də: "İsnadı ceyyiddir"

 

Məqalənin geri qalanı isə tamamən müəllifin təxəyyülündən ibarət olduğu üçün bu qədərlik bir cavabın insaf sahibləri üçün yetərli olacağını düşünərək zaman itkisindən çəkinirəm.

Nəticə etibarıyla məqalə müəllifinin uğursuzca qəbul etdirməyə çalışdığı "Qadınlara cümə fərzdir" fikri ittifaqla hər yönüylə batildir