Bu mövzudakı ismarıc sayı: 127

[Usuli]

Demokratiyada Zirvə - Onlar MSK qatında diridirlər..

 

Hökümətin iribuynuzlu məmurlarından biri “Avropa gəlsin bizdən seçki öyrənsin” demişdi bir zamanlar ... Bu sözün hikmətini anlamam biraz zaman aldı... və nəhayət 9 Fevral seçkilərində bunu anlamağa müvəffəq oldum...

Azərbaycan nəinki Şərqdə, hətta dünyada ölülərə səsvermə haqqı tanıyan ilk və yeganə ölkədir. Bu isə, “hakimiyyətin yeganə mənbəyinin xalq olması” prinsipinin real həyatda tətbiqində zirvədir... Məgər ölülər bizim xalqdan sayılmır?

Vətəndaş Koroğlunun da bu ölkənin müqəddəratını təyin etmə haqqı var... Xüsusilə də nümunəvi vətəndaş olduğunu nəzərə alsaq...

Niyə ölkəmizdə Ağqoyunlular və Qaraqoyunlular adlı seçki məntəqələri olmamalıdır? Ölkədəki siyasi vəziyyətə baxılarsa məncə ümumiyyətlə bu adları dəyişmək mənasız addım olub...

İndi siz mənə deyin görüm, “bizim ölkələrin idarəçilərini sadəcə xalq seçir”, “bizim ölkələrdə xalqın istəyinə müxalif heç bir qərar alına bilməz” deyə demokratik prinsiplərlə öyünən Avropanın hansı ölkəsi ölülərə səsvermə, ölkə müqəddəratını təyin etmə haqqı tanıyır? Sadəcə bir örnək verin! Bircə örnək! Verə bilməzsiniz...

Elə isə, Avropa gəlsin bizdən seçki, demokratiya öyrənsin... 

[Usuli]

Mövqe  Ortaqlığı

 

Avamdan fərqi sadəcə ərəbcə əzbərlədiyi bir neçə kəlimə olan “elm tələbələrinə” verilən və stabil olaraq təkrarlanan suallar vardır. Məsələn: Türkiyənin Suriyaya girməsi məsələsində mövqeyimiz necə olmalıdır?

Suriyanın bir cənubi Afrika ölkəsi olduğunu zənn edən bu tələbəcik də cavabında bir mövqecik bildirər. Və bu mövqecik artıq sual verənin də mövqeyidir... Yəni əvvəl sadəcə tələbənin mövqeyi idisə, indi olur ortaq – bizim mövqeyimiz...

Əzizlərim, əgər mövqeyin nə olduğunu özlüyündə anlamısınızsa, bunun siz tərəfə gedən avtobus marşrutu olmadığını və kiməsə soruşaraq bir anda öyrənilməyəcəyini də bilməniz lazımdır...

İnsanın mövqey sahibi olması əmək, araşdırma və vaxt tələb edir... Elə misal verdiyimiz sual haqda mövqe sahibi olmaq üçün ümumi dünya görüşü, siyasi vəziyyətlə yanaşı ən az bir neçə təməl məsələ haqda ciddi məlumat bazasına sahib olmaq lazımdır... Məsələn: Türkiyədəki kürd problemi... Onun kökləri və ortaya çıxış səbəbləri... Bu problemin həqiqətən də iki komunist təşkilatla Türk dövləti arasındamı yoxsa dövlətlə böyük bir xalq arasındamı olması... Bir xalqa öz dilində təhsil qadağası qoymağın hökmü... Türkiyənin hazırki iqtisadi halı və bunun çıxarılan savaşla əlaqəsi... Türk ordusunun dinlə əlaqələri... Bölgədə tutduğu siyasi xətt... və bir çox məsələ...

Qeyd etdiyim bu nöqtələri isə nəinki siz, hətta tələbəcikləriniz də bilmir... Bilgi sahibi olmadan mövqe sahibi olmaq isə, şəxsiyət sahibi olmadan şəxsi düşmənçilik güdmək qədər paradoksaldır...

 

Başqasından soruşub 20 saniyədə tutduğunuz mövqe sizin mövqe ola bilərmi? Minik heyvanına sahibinin göstərdiyi istiqamət/mövqe nə qədər heyvanın öz mövqeyidirsə, sizin də qısa müddətdə sahibləndiyiniz mövqe  sizin mövqeyinizdir...

Mövqe sadəcə təsadüfən ortaq ola bilər!.. Yox əgər kimdənsə “hazır paket” olaraq alınıbsa, bu paketə “mənim” yaxud “bizim” demə haqqınız yoxdur... Çünki reallıqda bu, nə mövqe deyil... nə də sənin deyil...

Bu sual “bizim mövqeyimiz necə olmalıdır” şəklində yox, ən yaxşı halda “sizin bu məsələdə mövqeyiniz nədir?” formasında soruşula bilər... O da, mövqeyin bir kopyasını özünüz üçün çıxarmaq məqsədilə deyil... Müzakirə edib, üzərində baş yoracaq bir nöqteyi-nəzərlə tanış olub, analiz etmək üçün...

Elə isə, həqiqətən “mənim” deyə biləcəyin neçə mövqeyə sahib olduğuna bax... həqiqətən mövqeydirmi? Həqiqətən sənindirmi?

[Muslih]

Dilənçinin Əl Kitabı – Kitabuz Zühd

 

“Kitabuz-Zühd” adıyla yazılmış, əslində “Dilənçinin Əl Kitabı” olaraq adlandırılmağa daha layiq olan kitablarla zəngindir İslami kitabxanalarımız... Bu cür kitabların bir də praktik versiyaları var... Zahidlər ensiklopediyası növündən müxtəlif tabaqat kitabları...

Bu kitablardakı ən böyük qəhrəmanlar ömürlərini bir köynəklə başa vurmuş, vaxtı olmadığı üçün bu tək köynəyini də yumayan, acdıqda zibillikdən qarpız qabığı toplayıb yeyən kimsələrdir...

Və ən maraqlısı odur ki, bu kitabların müəllifləri də elə belə adamlar yox, iribuynuzlu imamlardır...

 

Bu kitablardakı saxta standartlar o qədər yüksəkdir ki, əgər Quranın bizə tanıtdığı ən salih qullardan Süleymanı, Yusifi, Zülqərneyni - Allahın salamı hamısının üzərinə olsun - onlarla ölçsək hamısının dünyaya aldanmış, Allahdan uzaq olduqlarına qərar verməmiz lazım gələrdi...

 

Bu virus qaynağı olan kitablar bizə güvəndiyimiz insanlar tərəfindən bulaşdırıldı... O kitablarda təşviq edilən həyatın tam əksini yaşayan, oturduqda ayaqlarının altına kürklər sərilən “zahidlər” tərəfindən zəhərləndik...

Dünya və axirətin balanslı rifahını tövsiyə edən Quranla daban-dabana ziddiyyət təşkil edən bu kitablar, hər məhəlləsində bir “əllaməsi” olan İslam dünyasında necə yayıldı? Bu qədər böyük yalan necə ayaq açıb yeridi? Niyə adekvat tədbirlər alınaraq bu xəstəlik zamanında müalicə edilmədi? Yəqin ki, həkimlərimizin özünün də xəstə olması səbəbilə...

 

Bizlər xəstələrin yanına həkim zənn edərək müalicə üçün getməyin bədəllərini ödədik və ödəməyə davam edəcəyik... Müsəlmanlar maddi güclərinin böyük bir qismini itirərək, onları xəlifə adı altında idarə edən despotların köləsi olduqları kimi, xarici düşmənlərin də köləsinə çevrildilər... Eynilə Yapon atalar sözündə deyildiyi kimi: Ata işləyərkən oğul dincələrsə nəvə dilənçi olar... Biz məhz o dilənçilərik...

 

Bu zühd kitablarının əmələ gətirdiyi xəstəlikli düşüncə səbəbilə daxili və xarici azğınlar bizə hakim oldu, əzə bildikləri qədər əzdilər...

İslam ümməti günü-gündən daha da zəiflədi və rəqəmsal (digital) inqlabdan sonra müsəlmanların bütün sahələrdəki köləliyi tamamlanacaq...

Dünyaya ədalət gətirməklə əmr olunan ümmət uca Allahın təyin etidiyi dünya-axirət balansını pozduğu üçün başqalarının istilası nəticəsində həm dünyasını, həm axirətini itirəcək...

Bu səbəblə ölüm bu ümməti tamamilə bitirmədən bu zühd virusuyla mübarizə vacibdir…

[Usuli]

Saxtakarların Rekordlar Kitabı

 

Bizim necə böyük qəhrəmanlarımız var... Allahı yuxuda yüz dəfə (nə az nə çox düz yüz dəfə) görüb Onunla söhbət edənlər, bir oturuma əlli min hədisi sənədiylə nəql edənlər, mələklərə qulaqburması verənlər, milyondan artıq hədisi sənədiylə əzbərə bilənlər, Quranı gündə iki dəfə, hətta hər namazda xətm edənlər... Daha kimlər kimlər...

Bu qısa yazımda çoxsaylı qəhrəmanlıqlardan sadəcə birinə toxunmaq istəyirəm... Quran xətmi rekordlarına...

 

Başı sadəcə papaq üçün maket olmağa yarayacaq kimsələr müxtəlif şəxslər haqqında “hər namazda Quranı xətm edərdi”, “Ramazanda Quranı 60 dəfə xətm edərdi” şəklində iddialar edərək onları ucaltmağa çalışırlar...

Lakin, qəlblərini əsir almış şəxsiyyət kultu bunun o şəxslər üçün də, elə bu iddianı edənlər üçün də bir alçalma olduğunun fərqinə varmalarına mane olur…

Başqa şəxsiyyətləri ucaltma həvəsi insanın öz şəxsiyyət yetərsizliyinin ən bariz əlamətlərindəndir…

 

Gəlin insanı heyvandan ayıran ağıl nemətinin bir gərəyi olaraq bu informasiyanı təhlil etməyə çalışaq...

Qurani Kərimin tam oxunması/xətmi üçün ən qısa müddət orta hesabla 12 saatdır... Bir sutkada isə, 24 saat vardır...

Bu səbəblə bir insanın hər namazda Qurani Kərimi xətm etməsi mümkün deyil!

Ramazanda Quranı 60 dəfə xətm edən xəyali qəhrəmanlarımıza gəlincə... Bu bir gündə iki xətm deməkdir…

Uca Allah bizi müəyyən ehtiyaclarla yaratmışdır ki, bunlardan ən çox zaman alanı yuxudur... buna əlavə olaraq yemək, tualet, təmizlik və bu kimi ehtiyaclarımız vardır və bunlar təqribən günümüzün 10 saatını doldurur…

Əgər geri qalan vaxtımızı Quranı xətm etməyə ayırsaq, 14 saatda bunu sadəcə bir dəfə edə bilərik...

Beləcə bu kimi şəxsiyyətpərəstlik xəstəliyi simptomu olan rəvayətlərin həqiqəti əks etdirmədiyi sabit olar... Azacıq düşünməkdən zərər gəlməz…

 

Əgər bu rəvayətlər doğru olsaydı da, sahibləri üçün fəzilət və üstünlük sayılmazdı...

Çünki, Qurani Kərimin bu sürətlə oxunması mücərrəd oxunuşdan o tərəfə keçməz... Bu cür oxunan ayələrin üzərində düşünmək, tədəbbür etmək, incəliklərinə varmaq mümkün deyil.

Bu səbəblədir ki, Quranı vəhy etmək üçün seçilmiş Peyğəmbərin Quran xətm rekordu sadəcə son Ramazanda 2 dəfədir. Yəni 15 günə bitən xətm... Ancaq kraldan çox kralçılıq sizin məzhəbin təməl oyun qaydalarından biridir…

Qurani Kərim mücərrəd oxunuş üçün deyil, məhz saydığım məqsədlər üçün endirilmişdir... İçindəki çoxsaylı ayələrin də dəlalət etdiyi üzrə... Təfəkkür və tədəbbür etməmək isə, Quranın ən böyük qınaqlarındandır…

Sizin gəlir əldə etmək üçün kirayə verdiyiniz sağlam ağıl da buna dəlalət edir...

Nəticə etibarıyla Quranın bu cür oxunması, öndər sayılan bir şəxs üçün üstünlük yox qınaq səbəbi olmağa daha layiqdir... Quranı sürətlə oxumaqla öyünmək, namazı necə sürətlə qıldığıyla öyünməkdən daha çirkin bir şeydir...

Sizi and verirəm! Asiya qitəsindəki bütün etnik islam ölkələrini təmsil edən papaq kolleksiyanızdan bir neçəsini seçib, önünüzə qoyun və sizi heyvanlardan fərqləndirmək üçün verilmiş düşünmə qabiliyyətinizi heç olmasa arada işlədin... Gücə düşmədən…
 

[Usuli]

Sökəcəyiniz Medalları Taxmayın

 

Asan yolla qazanılan pullar daha rahat, əziyyətlə qazanılmış pullar isə, daha diqqətli xərclənər ... Yəqinki hər birimiz bunu müşahidə etmişik...

İnsanların onlara verilən dəyərləri xərcləməsi də eynilə bunun kimidir... Əgər sizin onlara verdiyiniz dəyəri çətinliklə, alın tərilə qazanıblarsa onu xərcləmədən öncə durub düşünəcəklər... Yox bu dəyəri asan yoldan, sizin tələskənliyiniz və duyğulara qapılmanız nəticəsində qazanıblarsa onu xərcləməkdən çəkinməyəcəklər...

 

Əgər birisi sizin qatınızda 10 xal qazandıracaq əməl edibsə, ona 30 xal verməyin! Çünki, havadan qazandığı 20 xalı xərcləməkdə tərəddüd etməyəcək...

Hətta bu 20 xalı xərclədiyi, boşa çıxardığı üçün ona qarşı münasibətinizi dəyişdirdikdə, sizinlə düşmən olacaq... Çünki, onun gözündə onu zirvədən aşağı endirməyə çalışan birisiniz... O zirvəyə onu layiq olmadığı halda layiq görənin siz olması bir şeyi dəyişməyəcək... Beləcə öz əllərinizlə özünüzə düşmən yetişdirmiş olacaqsınız…

İnsanlara sizi peşman etmələrində yardımçı olmayın ... Heç kimin yaxasına sonradan sökməyə məcbur qalacağınız medallar taxmayın...
 

[Usuli]

Nankorluq Neməti

 

Ətrafındakı insanların, yaxınlarının nankorluğundan şikayətlənməyən kimsə görmədim... Az və ya çox dərəcədə hamımız insanların nankorluğundan şikayətçiyik...

Düşünürəm ki, üzərində təfəkkür edilərsə bu mənfi hadisəni öz lehimizə istifadə edə bilərik...

Öncəliklə Qurani Kərimin çoxsaylı ayələrində ifadə edildiyi kimi insanın Rəbbinə qarşı çox nankor olduğunu xatırlayaraq təskinlik tapa bilərik... Bütün nemətlərin sahibinə nankorluq edənlərin bəzi kiçik nemətlərə vasitəçilik edənlərə qarşı minnətdar olmalarını gözləmək əbəsdir... Bu reallıqla barışmaq qaçınılmazdır...
 

Digər tərəfdən bu nankorluq bizim üçün bir həyəcan təbilidir... Başqalarına etdiyimiz kiçik yaxşılıqlara qarşı göstərilən nankorluqlar bizə bu qədər təsir edirsə, bizim nemətlərin əsl sahibi uca Allaha qarşı nankorluğumuz daha böyük bir cinayət deyilmi?

Bir qayda olaraq insanlar yaşadıqları şeyləri daha yaxşı anlayarlar... Bu kiçik nankorluqlar bizə əsl nankorluğumuzu xatırlama və gec olmadan bu xəstəlikdən qurtulma fürsəti verir və bu baxımdan bir nemət sayılmaları daha doğrudur…

 

[Usuli]

Ən Qorunaqlı Orqan

 

Anatomiya haqqında bir kitabı incələrkən, insan skeletinin daxili orqanların bəzilərini qoruma funksiyası üzərində düşünürdüm və diqqətimi çəkən bir məqam oldu. İnsan vücudunda sadəcə bir orqan tam bir sümük örtüyü ilə və dörd tərəfdən qorunur.

Bəli! Bu orqan beyindir. Uca Allah beyinin fiziki yöndən qorunması üçün onu sümükdən bir kaskayla əhatə edib. İnsan vücudunda bu qədər ciddi qorunan ikinci bir orqan yoxdur!

 

Beynin mənəvi qorunması üçün isə, onun işinə mane olacaq spirtli içki və bənzərləri qadağan edilib. Yüzlərcə ayədə müxtəlif örnəklər verilərək beynimizi işlətməyə təşviq edilmişik. Atalar dini və bənzəri kor-kar təqlid kimi viruslardan uzaq durmamız istənib…

Lakin, bütün bunlara rağmən insanların ən çox istifadə etmədiyi orqan beyindir…

Uca Allahın fiziki və mənəvi yöndən qorunmasını ən çox istədiyi bir şeyə qarşı bu cür bir etinasızlığın cəzası isə ağır olmalıdır… eynilə ayədə buyurulduğu kimi: Allah ağlını istifadə etməyənlərin üzərinə əzab yağdırar…

Bu səbəblə ətrafınıza diqqətlə baxdıqla ağlını kirayə vermiş milyonlarca insanın işgəncədən ibarət bir kölə həyatı yaşadığını görə bilərsiniz… halından məmnun kölələr… Onların bəziləri siyasi liderlərin, bəziləri din xadimlərinin minik heyvanlarından başqa bir şey deyil…

Bir insanın başqaları tərəfindən istifadə edilməsi, malını-canını başqalarının marağı üçün könüllü şəkildə verməsi, uşaqlarının gələcəyini oğurlayanları, zühdü tövsiyə edib lüks içində yaşayanları ayaq üstə alqışlaması, istifadə edildikdən sonra əski parçası kimi bir kənara atılması ona dünya əzabı və rəzalət olaraq yetər. Ağlını istifadə etməyənlərin axirət əzabı isə daha şiddətlidir…

[Usuli]

Dəyərlər Mübadiləsi

 

Ölkələr kimi insanlar da müəyyən təbii sərvətlərlə yaradılmışlar. Hər bir insana doğuşuyla başlayan, həyatını əhatə edən bir zaman dilimi verilər. Çalışaraq bilgi və bacarıq əldə etmək üçün insana ağıl bəxş edilər. Kişilər fiziki güclü, qadınlar zövq vermə, nəsil artırmaq üçün tarla olma xüsusiyyətilə yaradılar. Bəzilərinə valideynlərindən miras olaraq pul qalar.

Əslində bütün bu saydıqlarımız ayrılıqda bir valyuta kimidir və bizlər demək olar ki, hər zaman bazar şərtlərinə görə bu valyutaları bir-birilə mübadilə edə bilirik. Eynilə dollar, euro, manat və digər fərqli valyutaları bir-birilə dəyişdiyimiz kimi.

Məsələn xüsusi bilgi və bacarığa sahib olmasaq da, biri üçün sadə işlər görərək bizə verilən zaman valyutamızı pul valyutasına dəyişə bilərik. Yaxud əlimizdəki pulu verərək xüsusi bilgi və bacarıqlar əldə edə bilərik. Daha sonra bu bilgimizi və ya bacarığımızı daha çox pula dəyişə bilərik. Hətta pulumuzun özünü düzgün yatırılmış bir kapital ilə daha artıq pulla mübadilə edə bilərik.

Qadın onda yaradılmış olan zövq vermə, nəsil artırmaq üçün tarla olma xüsusiyyətini pula, yaxud bənzəri bir qarşılığa dəyişə bilər və dəyişir…

Kişi ona verilmiş fiziki güc valyutasını pula, yaxud qadına dəyişə bilər və dəyişir…

Zamanımızı pula dəyişdiyimiz kimi, pulumuzu verib zaman ala bilərik. İlk baxışda qəribə səslənsə də bu belədir. Məsələn birinə pul verərək işimizi ona gördürə və işə sərf edəcəyiniz zamanımızı ailəmizlə yaxud istədiyimiz başqa yerdə keçirə bilərik.

Hətta bu valyuta mübadiləsi mənəvi və maddi valyutalar arasında da ola bilər. Çünki, insanların mənəvi keyfiyyətləri bir valyuta növüdür. Bizlər mənəviyyatımızı, ədalətimizi, ləyaqətimizi pul qarşılığında sata bildiyimiz kimi, pulumuzu, bilgimizi özümüzə qalxan edərək bu mənəvi xüsusiyyətləri qoruya bilərik. Hətta şəxsiyyət valyutasını pul valyutasına dəyişdirməyə razı olan birinin şəxsiyyətini, ləyaqətini pulla ala bilərik və bu cür valyuta mübadiləsinə yaşadığımız hər gün şahid oluruq. Bütün bunlar müxtəlif valyutaların bir-birilə dəyişdirilməsi və aləmin hər parçasındakı ilahi nizamın bir halqasıdır…
Dünya həyatı bir növ ticarətdir… Geriyə sadəcə start kapital olan valyutalarımızı sərfəli valyutalara dəyişib uduzmamaq qalır… Axırəti verib dünyanı almaq, şərəf və ləyaqəti pula dəyişmək kimi…